Saturday, July 23, 2016

មនុស្ស​រាប់​ម៉ឺន​នាក់​ចូលរួម​ដង្ហែ​សព​បណ្ឌិត កែម ឡី ទៅ​ខេត្ត​តាកែវ


មនុស្ស​រាប់​ម៉ឺន​នាក់​ចូលរួម​ដង្ហែ​សព​បណ្ឌិត កែម ឡី ទៅ​ខេត្ត​តាកែវ​នៅ​ថ្ងៃ​អាទិត្យ ទី​២៤ កក្កដា ២០១៦។
ពិធី​ដង្ហែ​ចាប់​ផ្ដើម​ចេញ​​ពី​ពោធិយារាម ហៅ​វត្តចាស់ ក្នុង​រាជធានី​ភ្នំពេញ ឆ្ពោះ​ទៅ​ស្រុក​កំណើត​លោក កែម ឡី នៅ​ក្នុង​ភូមិ​អង្គតាកុប ឃុំ​លាយបូរ ស្រុក​ត្រាំកក់ ខេត្ត​តាកែវ ចាប់​ពី​ម៉ោង​៧​ព្រឹក។
សម្រាប់​កម្មវិធី​ដង្ហែ​សព​នេះ វិទ្យុអាស៊ីសេរី​ធ្វើ​ការ​ផ្សាយ​ផ្ទាល់​តាមរយៈ​ហ្វេសប៊ុក (Facebook) និង​យូធូប (Youtube) រយៈ​ពេល​១៣​ម៉ោង កន្លះ ចាប់​ផ្ដើម​ពី​ម៉ោង​៧​ព្រឹក រហូត​ដល់​ម៉ោង ៨ កន្លះ​យប់ (ម៉ោង​នៅ​កម្ពុជា)។
ក្រៅ​ពី​ការ​ផ្សាយ​ផ្ទាល់​ពី​ព្រឹត្តិការណ៍​នេះ វិទ្យុ​​យើង​ក៏​នឹង​លើក​យក​នូវ​ជីវប្រវត្តិ​លោក កែម ឡី សកម្មភាព​ការងារ រួម​នឹង​ស្នាដៃ​ជា​គំនិត​យោបល់​មួួ​យ​ចំនួន​​​របស់​លោក​ ដែល​ផ្ដល់​ដល់​សង្គម​ជាតិ និង​រដ្ឋាភិបាល​ជាដើម តាម​រយៈ​កិច្ច​សម្ភាសន៍​កន្លង​មក​ជាមួយ​វិទ្យុ​អាស៊ីសេរី។



___________________________
ប្រភពព័ត៌មានពី៖ អាស៊ីសេរី

សពលោកបណ្ឌិត​ កែម ឡី ត្រូវបានដង្ហែចេញពីកន្លែងតម្កល់ក្នុងវត្តចាស់ ទៅបញ្ចុះនៅស្រុកកំណើត ខេត្តតាកែវ



(ភ្នំពេញ)​៖ នៅម៉ោង ៧៖០០នាទីព្រឹកថ្ងៃទី ២៥ ខែកក្កដានេះ សពរបស់លោកបណ្ឌិត កែម ឡី ត្រូវបានគណៈកម្មការរៀបចំបុណ្យសព ដង្ហែចេញពីកន្លែងតម្កល់ នៅក្នុងវត្តចាស់ ស្ថិតនៅក្នុងខណ្ឌជ្រោយចង្វារ រាជធានីភ្នំពេញ តាមរថយន្តយកទៅបញ្ចុះ នៅស្រុកកំណើតរបស់លោក ស្ថិតនៅស្រុកត្រាំកក់ ខេត្តតាកែវ។
ក្បូនដង្ហែសពរបស់លោកបណ្ឌិត កែម ឡី នៅព្រឹកនេះ គេឃើញមានការចូលរួមយ៉ាងច្រើនកុះករ ពីសំណាក់ប្រជាពលរដ្ឋ ដោយធ្វើដំណើរតាមរថយន្ត និងម៉ូតូផងដែរ។
គិតមកដល់ពេលថ្ងៃដង្ហែនេះ រយៈពេល១៥ថ្ងៃគត់ ដែលសពរបស់លោកបណ្ឌិត កែម ឡី ត្រូវបានតម្កល់នៅវត្តចាស់ ស្ថិតក្នុងខណ្ឌជ្រោយចង្វារ។ លោកបណ្ឌិត កែម ឡី ត្រូវបានឃាតកបាញ់សម្លាប់ នៅក្នុងស្តាម៉ាត នៃស្ថានីយ៍សាំងកាលតិច ស្ថិតនៅស្តុបបូកគោ ខណ្ឌចំការមន កាលពីម៉ោង៨៖៥០នាទីព្រឹក ថ្ងៃទី១០ ខែកក្កដា ឆ្នាំ២០១៦ ខណៈលោកកំពុងអង្គុយទទួលទានកាហ្វេក្នុងស្តាម៉ាត។ មរណភាពរបស់លោក បានធ្វើឱ្យប្រជាពលរដ្ឋ ភាគច្រើនសម្តែងការសោកស្តាយយ៉ាងខ្លាំង ហើយថ្កោលទោសនូវអំពើឃាតកម្មនេះ៕



តំណាង​សហជីព​កម្មករ​និង​កសិករ​នឹង​ចូល​រួម​ដង្ហែ​សព​លោក​បណ្ឌិត កែម ឡី


ក្រុម​សហជីព កម្មករ និង​កសិករ​ឲ្យ​ដឹង​ថា ពួកគេ​នឹង​ចូលរួម​ដង្ហែ​សព​លោក​បណ្ឌិត កែម ឡី ដែល​ចាប់​ផ្ដើម​ពី​វត្ត​ចាស់ រហូត​ដល់​ស្រុក​កំណើត​លោក កែម ឡី នា​ខេត្ត​តាកែវ នៅ​ថ្ងៃ​ទី​២៤ ខែ​កក្កដា។ ពលរដ្ឋ​ដែល​ត្រៀម​ចូលរួម​ដង្ហែ​សព​លោក​បណ្ឌិត កែម ឡី គឺ​ដើម្បី​បង្ហាញ​ការ​សោកស្ដាយ​អំពី​វីរភាព​របស់​លោក។
​ក្រុម​សហជីព កម្មករ និង​កសិករ ដែល​នឹង​ទៅ​ចូលរួម​ដង្ហែ​សព​លោក​បណ្ឌិត កែម ឡី យល់​ថា ការ​បាត​បង់​លោក​បណ្ឌិត កែម ឡី គឺ​ជា​ការ​បាត់បង​ធនធាន​ដ៏​កម្រ​របស់​ប្រទេស​កម្ពុជា។
កសិករ​ម្នាក់​មក​ពី​ខេត្ត​ព្រះសីហនុ លោក សេន ចាន់ថា បាន​ប្រាប់​វិទ្យុ​អាស៊ីសេរី នៅ​ថ្ងៃ​ទី​២៣ កក្កដា ថា លោក និង​កសិករ​ជា​ច្រើន​នាក់​ទៀត​នៅ​ក្នុង​ភូមិ បាន​ជិះ​ឡាន​ស្នួល​ពី​ខេត្ត​ព្រះសីហនុ ដើម្បី​ចូលរួម​ដង្ហែ​សព​លោក​បណ្ឌិត កែម ឡី នៅ​ថ្ងៃ​ទី​២៤ កក្កដា។
លោក​ថា លោក កែម ឡី គឺ​ជា​មនុស្ស​ស្លូតត្រង់ មាន​ការ​វិភាគ​ត្រឹមត្រូវ ពិសេស​បាន​ជួយ​ដល់​កសិករ​ក្នុង​សហគមន៍​លោក ពាក់ព័ន្ធ​នឹង​បញ្ហា​ដីធ្លី​ផង​ដែរ៖ «គាត់​មាន​គុណ​សម្រាប់​ពួក​ខ្ញុំ​ណាស់ មក​លើ​ពួក​ខ្ញុំ ហើយ​គាត់​គឺ​ជា​បណ្ឌិត​មួយ​ដែល​ធ្លាប់​តែ​វិភាគ​ត្រឹមត្រូវ តាម​តែ​ខ្ញុំ​ស្តាប់​វិទ្យុ គាត់​វិភាគ​ជួយ​សង្គម និយាយ​ត្រង់​ទៅ​ខ្ញុំ​ដាច់​ចិត្ត​លក់​គោ​ដែល​ប្រវាស់​គេ ៥​ឆ្នាំ មក​ចូលរួម​បុណ្យ​សព​គាត់»
​ទន្ទឹម​នេះ កម្មការិនី​រោងចក្រ ជួន ស៊ី ក្នុង​សង្កាត់​ស្ទឹងមានជ័យ លោកស្រី គូន ស្រីមុំ ឲ្យ​ដឹង​ដែរ​ថា លោកស្រី និង​កម្មករ​ក្នុង​រោងចក្រ​លោកស្រី​ប្រមាណ​ជាង ២០០​នាក់​ទៀត នឹង​ទៅ​ចូលរួម​ដង្ហែ​សព​លោក កែម ឡី គឺ​ចង់​បង្ហាញ​ការ​ដឹង​គុណ​ដល់​រូបលោក​ដែល​បាន​បញ្ចេញ​មតិ​ដើម្បី​ចង់​ឲ្យ​សង្គម​រីក​ចម្រើន៖ «គាត់​ជា​បុរស​ម្នាក់​ដ៏​ស្លូតបូត មាន​ចំណេះ​ដឹង​ខ្ពង់ ជួយ​ជំរុញ​ក្រុម​និស្សិត និង​កម្មករ ឲ្យ​យល់​ដឹង​ពី​បញ្ហា​សង្គម អ៊ីចឹង​ការ​ទៅ​របស់​ខ្ញុំ​គឺ​ចង់​បង្ហាញ​ពី​ទឹក​ចិត្ត​អាណិត​ស្រឡាញ់​គាត់​ជា​រៀងរហូត»
​ក៏​មិន​ខុស​គ្នា​ពី​កម្មករ និង​កសិករ​ប៉ុន្មាន​ដែរ ប្រធាន​សហភាព​សហជីព​កម្ពុជា លោក អាត់ ធន់ ក៏​បាន​ប្រកាស​ថា ខ្លួន​នឹង​ទៅ​ចូលរួម​កម្មវិធី​ដង្ហែ​សព​លោក កែម ឡី នេះ​ដែរ ព្រោះ​លោក កែម ឡី មិន​ត្រឹមតែ​ជា​ធនធាន​មនុស្ស​ដ៏​សំខាន់​សម្រាប់​សង្គម​ប៉ុណ្ណោះ​ទេ លោក កែម ឡី ក៏​បាន​រួម​ចំណែក​ជួយ​ជំរុញ​ឲ្យ​ប្រាក់ខែ​កម្មករ​កម្ពុជា ប្រសើរ​ឡើង​ផង​ដែរ៖ «តាម​ពិត​ទៅ ការ​ស្លាប់​របស់​លោក កែម ឡី គឺ​ជា​រឿង​មួយ​សម្រាប់​មនុស្ស​ទូទៅ ក៏​ដូចជា​រូប​ខ្ញុំ​ផ្ទាល់ ព្រោះ​មនុស្ស​ដូច​លោក​បណ្ឌិត កែម ឡី មិន​ងាយ​រក​បាន​ទេ ព្រោះ​អ្នក​ខ្លះ​គាត់​ហ៊ាន​និយាយ​តែ​គាត់​គ្មាន​ការ​ស្រាវជ្រាវ​ត្រឹមត្រូវ និង​អំណះអំណាង​ដូច​លោក​នោះ​ទេ»
​ចំណែក​ឯ​លេខាធិការដ្ឋាន​សម្ព័ន្ធ​សហគមន៍​កសិករ​កម្ពុជា លោក ថេង សាវឿន ក៏​អះអាង​ថា លោក​នឹង​ដឹកនាំ​ក្រុម​យុវជន កម្មករ កសិករ អ្នក​រត់​រ៉ឺម៉ក​ទេសចរណ៍ និង​អាជីវករ​មក​ពី ៦​វិស័យ ទាំង​រាជធានី​ភ្នំពេញ និង​តាម​បណ្ដា​ខេត្ត​ទៅ​ចូលរួម​ដង្ហែ​សព​លោក​បណ្ឌិត កែម ឡី ពី​វត្ត​ចាស់ រហូត​ដល់​ខេត្ត​តាកែវ។
​ការ​ជ្រោមជ្រែង និង​ការ​ខ្នះខ្នែង​របស់​លោក​បណ្ឌិត កែម ឡី ចំពោះ​ការ​លះបង់ និង​ជួយ​សង្គម​របស់​លោក​កន្លង​មក។ ទីប្រឹក្សា​សហជីព​សេរី​កម្មករ​នៃ​ព្រះរាជាណាចក្រ​កម្ពុជា លោក ជា មុនី ក៏​រំពឹង​ថា នឹង​មាន​វត្តមាន​កម្មករ​រាប់​ម៉ឺន​នាក់​នៅ​ក្នុង​កម្មវិធី​ដង្ហែ​សព​លោក កែម ឡី ជា​លើក​ចុង​ក្រោយ​ផង​ដែរ។
ទន្ទឹម​នឹង​ការ​ប្រកាស​ថា ខ្លួន​នឹង​ទៅ​ចូលរួម​កម្មវិធី​ដង្ហែ​សព​លោក កែម ឡី នេះ​ដែរ ក្រុម​សហជីព​កម្មករ និង​ប្រជា​កសិករ ក៏​បាន​ថ្កោលទោស​ដល់​ការ​បាញ់​សម្លាប់​បណ្ឌិត កែម ឡី ព្រមទាំង​ស្នើ​ឲ្យ​មាន​ការ​ស៊ើប​អង្កេត​ឯករាជ្យ​លើ​ឃាតកម្ម​ដើម្បី​ផ្ដល់​ភាព​យុត្តិធម៌​ជូន​រូប​លោក។
ជាង​នេះ​ទៀត ក្រុម​សហជីព កម្មករ និង​កសិករ ក៏​បាន​អំពាវនាវ​ឲ្យ​ប្រជាពលរដ្ឋ​ខ្មែរ​ចូលរួម​ដង្ហែ​សព​លោក កែម ឡី ជា​លើក​ចុង​ក្រោយ ព្រមទាំង​អំពាវនាវ​ឲ្យ​កងកម្លាំង​សមត្ថកិច្ច​ចូលរួម​ថែរក្សា​សន្តិសុខ​សណ្ដាប់ធ្នាប់​ក្នុង​កម្មវិធី​ដង្ហែ​សព​នេះ​ដែរ។
កម្មវិធី​ដង្ហែ​សព លោក កែម ឡី ដែល​នឹង​ប្រព្រឹត្តិ​ទៅ​នៅ​ថ្ងៃ​ទី​២៤ ខែ​កក្កដា តាម​ប្រភព​សារព័ត៌មាន​ក្នុង​ស្រុក​បាន​ឲ្យ​ដឹង​ថា មាន​កងកម្លាំង​អាជ្ញាធរ មាន​សមត្ថកិច្ច ជិត ២.០០០​នាក់ ត្រៀម​ការពារ​សន្តិសុខ សុវត្ថិភាព សណ្ដាប់ធ្នាប់ របៀបរៀបរយ​ក្នុង​ពិធី​ដង្ហែ​សព​លោក​បណ្ឌិត កែម ឡី ចាប់​ពី​វត្ត​ពោធិយារាម ហៅ​វត្ត​ចាស់ ឆ្ពោះ​ទៅ​កាន់​ខេត្ត​តាកែវ៕







Thursday, July 21, 2016

លោក ហ៊ុន សែន ស្នើ​ឲ្យ​នាយក​រដ្ឋមន្ត្រី​ជប៉ុន​បកស្រាយ​រឿង​ស្ដី​បន្ទោស​រូប​លោក


អ្នក​ស្រាវជ្រាវ​ផ្នែក​កិច្ចការ​បរទេស លើក​ឡើង​ថា លោក​នាយក​រដ្ឋមន្ត្រី ហ៊ុន សែន ស្នើ​ឲ្យ​នាយក​រដ្ឋមន្ត្រី​ជប៉ុន ឬ​មន្ត្រី​រដ្ឋាភិបាល​ជប៉ុន បកស្រាយ​ឡើង​វិញ​ថា តើ​ជប៉ុន រិះគន់​លោក​ទាក់ទង​នឹង​ជំហរ​របស់​កម្ពុជា គាំទ្រ​លើ​បញ្ហា​ជម្លោះ​សមុទ្រ​ចិន​ខាង​ត្បូង ក្នុង​ជំនួប​ក្រៅ​កិច្ច​ប្រជុំ​អាស៊ី-អឺរ៉ុប លើក​ទី​១១ ក្នុង​រដ្ឋធានី​អ៊ូឡង់បាទ័រ (Ulan Bator) ប្រទេស​ម៉ុងហ្គោលី (Mongolia) ថា​ពិត ឬ​មិន​ពិត​នោះ គឺ​មិន​អាច​ទៅ​រួច​នោះ​ឡើយ។
អ្នក​ជំនាញ​ខាង​កិច្ចការ​បរទេស​ពន្យល់​ថា ទោះ​បី​ជា​ជប៉ុន មិន​បង្ហាញ​ជំហរ​រិះគន់​ជា​សាធារណៈ​ក៏ដោយ ក៏​ជប៉ុន សម្ដែង​ការ​មិន​ពេញ​ចិត្ត​ចំពោះ​កម្ពុជា ដែល​ប្រកាស​គាំទ្រ​ចិន​លើ​បញ្ហា​ជម្លោះ​សមុទ្រ​ចិន​ខាង​ត្បូង​នេះ​ដែរ។
លោក​នាយក​រដ្ឋមន្ត្រី​ស្នើសុំ​ឲ្យ​រដ្ឋាភិបាល​ជប៉ុន កែ​តម្រូវ​ឡើង​វិញ​ដែល​ថា​នាយក​រដ្ឋមន្ត្រី​ជប៉ុន លោក ស៊ីនហ្សូ អាបេ (Shinzo Abe) រិះគន់​រូប​លោក​អំពី​ជំហរ​រដ្ឋាភិបាល​កម្ពុជា ដែល​គាំទ្រ​ចិន លើ​បញ្ហា​ជម្លោះ​សមុទ្រ​ចិន​ខាង​ត្បូង​នោះ។
លោក ហ៊ុន សែន ថ្លែង​ដូច្នេះ​នៅ​ក្នុង​ពិធី​សម្ពោធ​ដាក់​ឲ្យ​ប្រើប្រាស់​សមិទ្ធផល​គម្រោង​ពង្រីក​ប្រព័ន្ធ​ផ្គត់ផ្គង់​ទឹក​ស្អាត​ជូន​ប្រជាពលរដ្ឋ​ខេត្ត​បាត់ដំបង និង​ខេត្ត​កំពង់ចាម នៅ​ថ្ងៃ​ទី​២១ កក្កដា ដែល​ធ្វើ​ឡើង​នៅ​ខេត្ត​បាត់ដំបង។ លោក​នាយក​រដ្ឋមន្ត្រី​បញ្ជាក់​ថា នៅ​ក្នុង​ជំនួប​ក្រៅ​កិច្ច​ប្រជុំ​អាស៊ី-អឺរ៉ុប លើក​ទី​១១ ក្នុង​រដ្ឋធានី​អ៊ូឡង់បាទ័រ ប្រទេស​ម៉ុងហ្គោលី នោះ នាយក​រដ្ឋមន្ត្រី​ជប៉ុន គ្មាន​ស្ដី​បន្ទោស ឬ​រិះគន់​លោក​លើ​បញ្ហា​សមុទ្រ​ចិន​ខាង​ត្បូង​នេះ​ទេ៖ «សារព័ត៌មាន​មួយ​នៅ​ភ្នំពេញ​ដែល​មាន​ភាសា​ខ្មែរ​ផង អង់គ្លេស​ផង ថា អាបេ ស្ដី​បន្ទោស​ឲ្យ​លោក ហ៊ុន សែន សុំ​ទោស​នៅ​លើ​សាកលលោក​នេះ គ្មាន​អ្នក​ណា​ស្ដី​ឲ្យ ហ៊ុន សែន ទេ។ សុំ​ទោស​អា​រឿង​ស្ដី​បន្ទោស​នោះ​អត់​ទេ សូម្បី​ប្រធានាធិបតី​សហរដ្ឋ​អាមេរិក លោក អូបាម៉ា (Barack Obama) មក​កម្ពុជា មិន​ហ៊ាន​ស្ដី​ឲ្យ ហ៊ុន សែន ផងចឹង​ខ្ញុំ​មិន​មាន​ការ​ឆ្លើយ​តប​អី​ទេ ទោះ​បី​ជា ផៃ ស៊ីផាន ឆ្លើយ​តប​ក៏ដោយ តែ​ខ្ញុំ​មិន​ឆ្លើយ​តប​ទេ ទុក​ឲ្យ អាបេ ឆ្លើយ​តប។ ខ្ញុំ​ទុក​ឲ្យ​រដ្ឋមន្ត្រី​ជប៉ុន ឆ្លើយ​តប ថា​តើ​អត្ថបទ​នោះ​ត្រឹមត្រូវ ឬ​មិន​ត្រូវ
វិទ្យុ​អាស៊ីសេរី មិន​អាច​ទាក់ទង​មន្ត្រី​ស្ថានទូត​ជប៉ុន ប្រចាំ​នៅ​កម្ពុជា ដើម្បី​សុំ​បកស្រាយ​ជុំវិញ​ករណី​នេះ​បាន​នៅ​ឡើយ​ទេ នៅ​ថ្ងៃ​ទី​២១ កក្កដា។
ការ​ប្រតិកម្ម​របស់​លោក​នាយក​រដ្ឋមន្ត្រី ហ៊ុន សែន នេះ ធ្វើ​ឡើង​ក្រោយ​ពី​កាសែត ឌឹ ខេមបូឌា ដេលី (The Cambodia Daily) បាន​ចុះ​ផ្សាយ​កាល​ពី​ថ្ងៃ​ទី​១៩ កក្កដា ដោយ​ស្រង់​សេចក្ដី​ថ្លែងការណ៍​របស់​ជប៉ុន ថា នាយក​រដ្ឋមន្ត្រី​ជប៉ុន ហាក់​រិះគន់​ខ្លាំងៗ​ចំពោះ​ជំហរ​របស់​កម្ពុជា លើ​ជម្លោះ​សមុទ្រ​ចិន​ខាង​ត្បូង ដោយ​លើក​ឡើង​ថា សេចក្ដី​សម្រេច​របស់​តុលាការ​អន្តរជាតិ​លើ​ការ​អះអាង​សិទ្ធិ​កាន់​កាប់​ទឹក​ដី​ដោយ​ប្រទេស​ចិន គួរ​តែ​ត្រូវ​បាន​គោរព។
សេចក្តី​ថ្លែងការណ៍​នេះ​បាន​លើក​ឡើង​ទៀត​ថា «លោក​នាយក​រដ្ឋមន្ត្រី​ជប៉ុន ស៊ីនហ្សូ អាបេ (Shinzo Abe) បាន​មាន​ប្រសាសន៍​ថា នីតិរដ្ឋ គួរ​តែ​ជា​មូលដ្ឋាន​សម្រាប់​ការ​ដោះស្រាយ​បញ្ហា​តំបន់​ដោយ​សន្តិវិធី ដែល​មាន​សារសំខាន់​សម្រាប់​សន្តិភាព និង​ស្ថិរភាព​របស់​តំបន់​ទាំង​មូល ក្នុង​នោះ​រួម​មាន​ទាំង​ប្រទេស​ជប៉ុន ដែរ។ ហើយ​សេចក្ដី​សម្រេច​របស់​តុលាការ​មជ្ឈត្តកម្ម បាន​ចូល​ជា​ស្ថាពរ និង​ចង​ភ្ជាប់​កាតព្វកិច្ច​សម្រាប់​ភាគី​ទាំង​ពីរ គួរ​តែ​ជា​មូលដ្ឋាន​សម្រាប់​ការ​ចរចា»
សេចក្ដី​ថ្លែងការណ៍​ដដែល​បាន​ឲ្យ​ដឹង​ទៀត​ថា ចំណែក​ឯ​លោក​នាយក​រដ្ឋមន្ត្រី ហ៊ុន សែន បាន​ប្រាប់​លោក អាបេ ថា លោក​សង្ឃឹម​ថា​ប្រទេស​ចិន និង​អាស៊ាន នឹង​មាន​ការ​រីក​ចម្រើន​នៅ​ក្នុង​ការ​ដោះស្រាយ​ជម្លោះ​នេះ។
ទោះ​បី​ជា​បែប​ណា​ក៏ដោយ អ្នក​ស្រាវជ្រាវ​ផ្នែក​នយោបាយ​ការ​បរទេស និង​សិទ្ធិ​មនុស្ស​អន្តរជាតិ លោក ឡុង គឹមឃន ពន្យល់​ថា ជំហរ​រដ្ឋាភិបាល​កម្ពុជា គាំទ្រ​ចិន នោះ គឺ​ធ្វើ​ឲ្យ​ប៉ះពាល់​ដល់​ប្រយោជន៍​ប្រទេស​ជប៉ុន ហើយ​ជប៉ុន សម្ដែង​ការ​ព្រួយ​បារម្ភ​ចំពោះ​បញ្ហា​នេះ ទោះ​បី​ជា​ជប៉ុន មិន​បាន​ស្ដី​បន្ទោស​ឲ្យ​ចំៗ​ក្ដី តែ​ការ​បង្ហាញ​ក្ដី​ព្រួយ​បារម្ភ​នេះ ជា​រឿង​មួយ​មិន​ធ្វើ​ឲ្យ​រដ្ឋាភិបាល​កម្ពុជា ចំណេញ​លើ​កិច្ចការ​បរទេស​នោះ​ឡើយ៖ «យើង​ត្រូវ​ដឹង​ថា ជប៉ុន រឿង​ចឹងៗ​គាត់​អត់​និយាយ​ទេ។ ចឹង​កាលណា​ជប៉ុន គាត់​និយាយ គាត់​សម្ដែង​ការ​ព្រួយ​បារម្ភ គឺ​ប៉ះពាល់​ដល់​ប្រយោជន៍​ជប៉ុន ខ្លាំង ហើយ​ជប៉ុន គេ​ជួយ​យើង​ច្រើន​ដែរ​បន្ទាប់​ពី​ចិន គឺ​ជប៉ុន ជួយ​យើង​ច្រើន ហើយ​កម្ពុជា ត្រូវ​ថ្លឹង បើ​មិន​ចឹង​ទេ អាច​ឲ្យ​ទំនាក់ទំនង​កម្ពុជា ប្រឈម​មុខ​គ្នា។ រឿង​ថា​ឲ្យ​ជប៉ុន បកស្រាយ ខ្ញុំ​មើល​ទៅ​ថា​មិន​អាច​ទៅ​រួច​ទេ»
លោក​នាយក​រដ្ឋមន្ត្រី ហ៊ុន សែន បាន​ប្រកាស​នៅ​ក្នុង​ពិធី​រំឭក​ខួប ៦៥​ឆ្នាំ​នៃ​ការ​បង្កើត​គណបក្ស​ប្រជាជន​កម្ពុជា ថា កម្ពុជា នឹង​ប្រឆាំង​ចំពោះ​ការ​ចេញ​សេចក្តី​ថ្លែងការណ៍​រួម​ណា​មួយ​របស់​អាស៊ាន ដែល​គាំទ្រ​សាល​ដីកា​របស់​តុលាការ​មជ្ឈត្តកម្ម (Permanent Court of Arbitration) ពាក់ព័ន្ធ​នឹង​ជម្លោះ​នៅ​សមុទ្រ​ចិន​ខាង​ត្បូង ព្រោះ​កម្ពុជា ចាត់​ទុក​ថា វា​គឺ​ជា​ការ​ឃុបឃិត​នយោបាយ​ដ៏​អាក្រក់​បំផុត ដែល​លទ្ធផល​អាច​នឹង​នាំ​ទៅ​ដល់​ការ​បែក​បាក់​រវាង​ប្រទេស​អាស៊ាន​គ្នា​ឯង​ផង និង​រវាង​អាស៊ាន និង​ចិន ផង។
ទាក់ទង​នឹង​បញ្ហា​នេះ លោក ឡុង គឹមឃន បញ្ជាក់​ថា ប្រទេស​នៅ​ក្នុង​អាស៊ាន​មួយ​ចំនួន​ទៀត ក៏​មិន​គាំទ្រ​ចិន ដែរ ដូចជា​ឡាវ និង​ថៃ ជាដើម តែ​គេ​មិន​បង្ហាញ​ជំហរ​សាធារណៈ​ដូច​រដ្ឋាភិបាល​កម្ពុជា ទេ ដើម្បី​រក្សា​ទំនាក់ទំនង​រវាង​ប្រទេស​ក្នុង​តំបន់​ផង និង​ជប៉ុន ផង ព្រោះ​ជប៉ុន គឺ​ជា​សម្ព័ន្ធ​មិត្ត​នឹង​សហរដ្ឋ​អាមេរិក និង​ប្រទេស​ផ្សេងៗ​ទៀត។ ម្យ៉ាង​វិញ​ទៀត ជម្លោះ​សមុទ្រ​ចិន​ខាង​ត្បូង​នេះ គឺ​ធ្វើ​ឲ្យ​ជប៉ុន ខាត​ប្រយោជន៍​ក្នុង​ការ​ធ្វើ​ពាណិជ្ជកម្ម​អន្តរជាតិ ព្រោះ​ថា​សមុទ្រ​ចិន​ខាង​ត្បូង គឺ​ជា​ការ​ដឹក​ជញ្ជូន​ឆ្លង​កាត់​របស់​ជប៉ុន ដ៏​សំខាន់​មួយ។
ក្នុង​ពេល​ទៅ​ចូលរួម​កិច្ច​ប្រជុំ​អាស៊ី-អឺរ៉ុប លើក​ទី​១១ នៅ​ប្រទេស​ម៉ុងហ្គោលី នោះ ចិន បាន​សន្យា​ផ្ដល់​ជំនួយ ៦០០​លាន​ដុល្លារ​សហរដ្ឋ​អាមេរិក​ដល់​រដ្ឋាភិបាល​កម្ពុជា។ ទោះ​បី​ជា​យ៉ាង​នេះ​ក្ដី ជប៉ុន គឺ​ជា​ប្រទេស​បាន​ផ្ដល់​ជំនួយ​ឥណទាន​ហិរញ្ញប្បទាន​ឥត​សំណង និង​ជំនួយ​បច្ចេកទេស​ច្រើន​ជាង​គេ​បន្ទាប់​ពី​ចិន៕

គ្រួសារ​សុខ​ចិត្ត​ដង្ហែ​សព​លោក​ កែម ​ឡី ​ដោយ​មិន​មាន​ថ្មើរជើង

ភ្នំពេញៈ បន្ទាប់ពី​បើក​កិច្ចប្រជុំ​ពីរ​ថ្ងៃ​ជាប់​គ្នា​សាលា​រាជធានី​ និង​ក្រុម​គ្រួសារ​​សព​បាន​ឯកភាព​គ្នា​ត្រង់​ចំណុច​សេសសល់​ដោយ​អាជ្ញាធរ​អនុញ្ញាត​ឱ្យ​ហែ​សព​លោក កែម ឡី តាម​ផ្លូវ​ធំ​ខណៈ​ភាគី​សព​ព្រម​ធ្វើ​ពិធី​ដង្ហែ​នេះ​ដោយ​យាន​ជំនិះ​ចៀសវាង​​ការ​ដង្ហែ​ដោយ​ថ្មើរ​ជើង​។
ក្រោយ​បញ្ចប់​កិច្ចប្រជុំ​លើក​ទី​ពីរ​ម្សិលមិញ​សាលា​រាជធានី​បាន​ធ្វើ​កំណត់​ហេតុ​ដោយ​សម្រេច​ថា​គ្រួសារ​សព និង​អ្នក​រៀបចំ​កម្មវិធី​ដង្ហែ​បាន​ឯកភាព​គ្នា​ជាមួយ​រដ្ឋបាល​រាជធានី​ធ្វើការ​ហែ​សព​ចេញ​ដំណើរ​ពី​វត្ត​ពោធិ៍​យារាម​ហៅ​វត្ត​ចាស់​នៅ​វេលា​​ម៉ោង ៧ ព្រឹក​ដោយ​ប្រើ​រថយន្ត និង​ម៉ូតូ​រួច​ចេញ​ដំណើរ​តាម​ផ្លូវ​ជាតិ​លេខ ៦ រួច​បន្ត​ដំណើរ​តាម​មហាវិថី​ព្រះមុនីវង្ស​ មហាវិថី​សហព័ន្ធ​រុស្ស៊ី​ឆ្ពោះ​ទៅ​រង្វង់​មូល​ចោមចៅ​រួច​បន្ត​ដំណើរ​តាម​ផ្លូវ​ជាតិ​លេខ ៣ ដោយ​មិន​មាន​ការ​ដង្ហែ​សព​តាម​ថ្មើរជើង​ឡើយ។
លោក នឿន ចាន់នី បង​ថ្លៃ​សព​លោក កែម ឡី លើក​ឡើង​ថា​បន្ទាប់ពី​បាន​ឯកភាព​គ្នា​ខាង​ក្រុម​គ្រួសារ​សព និង​គណៈកម្មការ​រៀបចំ​បាន​និង​កំពុង​រៀបចំ​ជា​បណ្តើរៗ​នូវ​សម្ភារ​បម្រើ​ឱ្យ​ការងារ​ដង្ហែ​សព​ដូចជា​ទទួល​បាន​រថយន្ត​ចំនួន ៣០ គ្រឿង និង​មាន​ការ​ឧបត្ថម្ភ​សម្ភារ​ផ្សេងៗ​ទៀត។
លោក​ស្នើសុំ​កិច្ចសហការ​ពី​អាជ្ញាធរ​មូលដ្ឋាន​ការពារ​សន្តិសុខ​ដើម្បី​ឱ្យ​សព​បាន​ទៅ​ដល់​ទីតាំង​បញ្ចុះ​​​ដោយ​សុវត្ថិភាព។
អភិបាលរង​រាជធានី​​លោក ឃួង ស្រេង ថ្លែង​ថា​ក្នុង​នាម​អាជ្ញាធរ​ដែនដី​លោក​នឹង​ខិតខំ​យក​ចិត្ត​ទុកដាក់​ក្នុង​ការ​ការពារ​សន្តិសុខ​សណ្តាប់ធ្នាប់​ពិសេស​បញ្ចៀស​ការ​កកស្ទះ​ចរាចរណ៍​ក្នុង​រាជធានី​ភ្នំពេញ។
តែ​លោក​ព្រមាន​ថា «ប្រសិន​បើ​ជន​ឆ្លៀត​ឱកាស​ប្រើប្រាស់​ការ​ដង្ហែ​សព​បម្រើ​ឱ្យ​ឆន្ទៈ​នយោបាយ​អាជ្ញាធរ​មាន​សមត្ថកិច្ច​នឹង​ចាត់​វិធានការ​​ក្នុង​គោលដៅ​ថែរក្សា​សន្តិសុខ​ខណៈ​អាជ្ញាធរ​ខណ្ឌ​ពាក់ព័ន្ធ​នឹង​ត្រូវ​ដាក់​កម្លាំង​តាម​ដង​ផ្លូវ​ដែល​ក្បួន​ឆ្លង​កាត់»។
យ៉ាង​នេះ​​​ក្តី​លោក​សង្កត់​ធ្ងន់​ថា​បើ​ប្រជាពលរដ្ឋ​ចូលរួម​ដើរ​ថ្មើរ​ជើង​នឹង​ទទួល​ខុសត្រូវ​ដោយ​ខ្លួន​ឯង​​នៅ​ពេល​មាន​បញ្ហា​កើត​ឡើង។ ​​«វិធានការ​យើង​មាន​តែ​យើង​នឹង​អំពាវនាវ​ដល់​បងប្អូន​យោគយល់​​បញ្ហា​នេះ​ព្រោះ​កាលណា​ធ្វើ​ផ្តេសផ្តាស​វា​ខូច​សណ្តាប់ធ្នាប់​សាធារណៈ ...បើ​គាត់​ធ្វើ​បែប​អនាធិបតេយ្យ​គាត់​ទទួល​ខុស​ត្រូវ​ខ្លួន​ឯង​»។
លោក កែម រិទ្ធិសិត ប្អូន​ប្រុស​លោក កែម ឡី ថ្លែង​ថា​មូលហេតុ​ដែល​ចង់​​ហែ​សព​នៅ​លើ​ផ្លូវ​ធំ​ដោយសារ​លោក​តែងតែ​ទទួល​បាន​ទូរស័ព្ទ​សំណូមពរ​ពី​មហាជន​ថា​សព​នេះ​ជា​សព​របស់​មហាជន។
តែ​ស្នងការ​រង​នគរបាល​ជាតិ​លោក ស៊ឹម វុទ្ធី សម្តែង​ការ​ព្រួយ​បារម្ភ​ដោយសារ​ថ្មីៗ​នេះ​មាន​ជន​ឆ្លៀត​ឱកាស​បាន​ធ្វើការ​អំពាវនាវ​ឲ្យ​មាន​ការ​ដង្ហែ​សព​ពេញ​ទីក្រុង​ភ្នំពេញ។
លោក​ថា​៖«អ្នក​រៀបចំ​កម្មវិធី​ត្រូវ​អនុលោម​តាម​ការ​ឯកភាព​គ្នា​ចៀសវាង​មាន​ជន​ឆ្លៀត​ឱកាស​បង្វែរ​ការ​ហែ​សព​ខុស​គោលដៅ​ហើយ​នៅ​ពេល​ហែ​ខុស​​ផ្លូវ​សមត្ថកិច្ច​នឹង​ធ្វើ​ការ​ហាមឃាត់​ព្រម​ទាំង​ណែនាំ​ឱ្យ​ហែ​សព​ឱ្យ​បាន​ត្រឹមត្រូវ​ជា​ហេតុ​ធ្វើ​ឱ្យ​ព្រលឹង​មិន​ស្ងប់»។
ក្នុង​កំណត់​ហេតុ​បន្ត​ថា​មន្ទីរ​សុខាភិបាល​រាជធានី​ត្រូវ​ចាត់​រថយន្ត​សង្គ្រោះ​ចំនួន ២ គ្រឿង​សម្រាប់​តាម​ក្បួន​នេះ​ខណៈ​ស្នងការ​រាជធានី​ភ្នំពេញ​នឹង​ត្រូវ​ចាត់​ម៉ូតូ​ស៊ីរ៉ែន ១ គ្រឿង​ដើម្បី​នាំ​ក្បួន។
ប្រធាន​បណ្តាញ​យុវជន​កម្ពុជា និង​ជា​សមាជិក​គណៈកម្មការ​បុណ្យ​សព​លោក ទឹម ម៉ាឡៃ ថ្លែង​ថា​គណៈកម្មការ​នៅ​តែ​អំពាវនាវ​ដល់​បងប្អូន​ដែល​ចូលរួម​ដង្ហែ​សព​ត្រូវ​ប្រើ​យានជំនិះ​ និង​រក្សា​ភាព​ស្ងប់ស្ងាត់​។ តែ​​លោក​មិន​អាច​ហាមឃាត់​ពលរដ្ឋ​ដែល​ចង់​ចូលរួម​ដោយ​ថ្មើរ​ជើង​​បាន​​ទេ។
លោក​ថា៖ «​ប្រសិន​បើ​ប្រជាពលរដ្ឋ​ចង់​ដើរ​តាម ២០ ឬ ៣០ ម៉ែត្រ​ចង់​ឈរ​មើល ឬ​ចង់​ដើរ​តាម​ពី​បី​គីឡូ​ម៉ែត្រ​សួរ​ថា​តើ​យើង​ត្រូវ​ហាម​ឃាត់​ម៉េច​បើ​គាត់​ចង់​ចូលរួម​នេះ​ជា​សិទ្ធិ​របស់​គាត់​ក្នុង​ការ​បង្ហាញ​​ការ​គាំទ្រ​សព​លោក កែម ឡី»​។
សព​លោក​បណ្ឌិត កែម ឡី នឹង​ត្រូវ​ហែ​នៅ​ថ្ងៃ​អាទិត្យ​ ទី ២៤ ខែ​កក្កដា​នេះ​វេលា​ម៉ោង ៧ ព្រឹក​ឆ្ពោះ​ទៅ​បញ្ចុះ​នៅ​ស្រុក​កំណើត​របស់​លោក​នៅ​ភូមិ​អង្គតាកុប ឃុំ​លាយបូរ ស្រុក​​ត្រាំកក់ ខេត្ត​តាកែវ​៕

Tuesday, July 19, 2016

ឯកអគ្គរដ្ឋទូត​តួកគី​ថា ​រដ្ឋាភិបាល​លោក​មាន​បំណង​ចង់​ឲ្យ​មាន​ការ​បិទ​សាលា​អន្តរជាតិ ZAMAN


ភ្នំពេញៈ ឯកអគ្គរដ្ឋទូត​តួកគី​​ប្រចាំ​កម្ពុជា Ilhan Khemal Tug បាន​ប្រកាស​​អំពី​​គោលបំណង​របស់​រដ្ឋាភិបាល​​តួកគី​​​ចង់​ឲ្យ​មាន​ការ​បិទ​​​សាលា​អន្តរជាតិ Zaman និង​សាកលវិទ្យាល័យ Zaman នៅ​រាជធានី​ភ្នំពេញ​​​​ដោយសារ​​ការ​ជាប់​ពាក់ព័ន្ធ​របស់​សាលា​នេះ​​ជាមួយ​ចលនា​លោក​​ Gulen ដែល​ធ្វើ​រដ្ឋប្រហារ​នៅ​តួកគី​បរាជ័យ​ប៉ុន្តែ​ប្រធាន​ក្រុម Zaman ថា​លោក Gulen គ្មាន​ទំនាក់​ទំនង​ផ្លូវការ​ជាមួយ​សាលា​ទេ។
កាលពី​ថ្ងៃ​ទី​ ១៥ កក្កដា ​កង​ប្រដាប់​អាវុធ​​តួកគី​​បាន​​​ប៉ុន​ប៉ង​ធ្វើ​រដ្ឋប្រហារ​​​​យោធា​​​​បណ្តេញ​​​ប្រធានាធិបតី​បច្ចុប្បន្ន​លោក Recep Erdogan ពី​អំណាច​។ ​ ប៉ុន្តែ​រដ្ឋប្រហារ​នេះ​បាន​បរាជ័យ​ហើយ​​​រដ្ឋាភិបាល​បាន​ចោទ​សមាជិក​​ចលនា​​សង្គម​អ៊ិស្លាម​​សេរី​​របស់​លោក​​ Fethullah Gulen ​ជា​អ្នក​ប៉ុនប៉ង​ធ្វើ​រដ្ឋប្រហារ​នេះ​។
ឯកអគ្គរដ្ឋទូត​ Tug ​បាន​ថ្លែង​​ក្នុង​អំឡុង​​​​សន្និសីទ​កាសែត​​មួយ​នៅ​ស្ថានទូត​​តួកគី​​កាលពី​ម្សិលមិញ​ថា​៖ «​នេះ​គឺ​​លើស​ពី​ផែនការ​ក្បត់​ដ៏​​គ្រោះថ្នាក់​​​»។ «​វា​ជា​យុទ្ធនាការ​ភេរវកម្ម​»។
រដ្ឋាភិបាល​តួកគី​ជាយូរ​មក​ហើយ​បាន​​ចាត់​ទុក​​​​លោក Fethullah Gulen ​​​ជា​ភេរវករ​ និង​ចោទ​ចលនា​របស់​គាត់​ថា​ជា​អង្គការ​ភេរវកម្ម។
សាលា​ ZAMAN នៅ​កម្ពុជា​​ត្រូវ​បាន​បង្កើត​ឡើង​ដោយ Atilla Yusef Guleker ដែល​ជា​អតីត​​អ្នក​កាសែត​នៅ​ប្រទេស​តួកគី​​ និង​ជា​សមាជិក​​នៃ​ចលនា​លោក Gulen។ Guleker ជា​អ្នក​កាសែត​សរសេរ​ឲ្យ​កាសែត​ ZAMAN ​ដែល​មាន​ទំនាក់​ទំនង​នយោបាយ​ជិតស្និទ្ធ​ជាមួយ​លោក Fethullah Gulen។
ក្នុង​សេចក្តី​ថ្លែងការណ៍​មួយ​​​ដោយ​លោក​ Ejder Kilic ប្រធាន​ក្រុមហ៊ុន ZAMAN បាន​ថ្លែង​ថា​ស្ថាប័ន​របស់​លោក​​ទទួល​ស្គាល់​​​ការ​ជាប់​ពាក់ព័ន្ធ​ «ផ្នែក​ស្មារតី​» ​ជាមួយ​លោក Gulen ប៉ុន្តែ​បាន​អះអាង​ថា៖ «លោក Gulen មិន​ដែល​មាន​ទំនាក់​ទំនង​ផ្លូវការ​ណា​មួយ​ភាព​ជា​ម្ចាស់​ណា​មួយ ឬ​​​ចលនា​ណា​មួយ​​​ក្នុង​​ការ​គ្រប់គ្រង​សាលា​ហើយ​គាត់​​ក៏​មិន​ដែល​ចូលរួម​ក្នុង​​​ផ្នែក​ណា​មួយ​​​​នៃ​ការ​ធ្វើ​សេចក្តី​សម្រេច​របស់​សាលា​​ដែរ​»។
ទោះ​យ៉ាង​ណា​ក្តី​ឯកអគ្គរដ្ឋទូត​ Tug បាន​អះអាង​ថា​រដ្ឋាភិបាល​តួកគី​​​រំពឹង​ថា​កម្ពុជា​​នឹង​ «​បញ្ឈប់​​រាល់​ការ​គាំទ្រ​» ​ទាំងអស់​​ទៅ​លើ​សាលា​ ZAMAN ដើម្បី​​ឲ្យ​សាលា​​ «​បញ្ចប់​​រាល់​​​សកម្មភាព​​ទាំងអស់​» ដោយសារ​ការ​​ជាប់​ពាក់ព័ន្ធ​​របស់​ខ្លួន​ជាមួយ​លោក Gulen។
សមាជិក​ចលនា​លោក Gulen បាន​បង្កើត​សាលា​​​​ក្នុង​​​​ប្រទេស​នានា​​ទូទាំង​ពិភពលោក​រួម​ទាំង​សាលា​​​ ១០០ ​​​នៅ​សហរដ្ឋ​អាមេរិក​ ​និង​​សាលា​ជាង​ ៣០០ ​​នៅ​តួកគី​។ លោក Gulen បច្ចុប្បន្ន​​នៅ​សហរដ្ឋ​អាមេរិក។
អគ្គរដ្ឋទូត​ Tug បាន​បញ្ជាក់​ថា​​សំណើ​នេះ​កំពុង​​ធ្វើ​ឡើង​ក្នុង​ប្រទេស​ទាំងអស់​​​ដែល​មាន​សាលា​​ជាប់​ពាក់ព័ន្ធ​នឹង​​ចលនា Gulen ខណៈ​ប្រទេស​តួកគី​ប៉ុនប៉ង​បិទ​ «​សាលា​​ទាំងអស់​​​ជុំវិញ​ពិភពលោក​​ដែល​ពាក់ព័ន្ធ​នឹង​​​អង្គការ​ភេរវកម្ម​​របស់​លោក Fethullah Gulen(FETO)»។
សន្តិសុខ​នៅ​មុខ​សាលា​អន្តរជាតិ ZAMAN កាលពី​ម្សិលមិញ។
សន្តិសុខ​នៅ​មុខ​សាលា​អន្តរជាតិ ZAMAN កាលពី​ម្សិលមិញ។ ហុង មិនា
នៅក្នុង​សេចក្តី​ថ្លែងការណ៍​របស់​ Kilic ​បាន​ពន្យល់​ថា​​៖ «​​សាលា​នេះ​គឺ​ត្រូវ​បាន​ផ្តល់​អាជ្ញាប័ណ្ណ​​ដោយ​ក្រសួង​​អប់រំ យុវជន ​និង​កីឡា​ដែល​ដំណើរការ​ក្រោម​ក្រុមហ៊ុន ZAMAN Co Ltd ​ជា​ក្រុមហ៊ុន​ចុះ​បញ្ជី​នៅ​ក្រសួង​ពាណិជ្ជកម្ម​ផង​ដែរ​»។
«​ដូច្នេះ​សាលា​នេះ​គឺជា​សាលា​កម្ពុជា​ដែល​​ត្រូវ​បាន​ពិនិត្យ​​ទៀងទាត់​បង់​ពន្ធ​​ត្រឹមត្រូវ​​ និង​​ប្រតិបត្តិការ​ក្រោម​គណៈកម្មាធិការ​សាលា​»។
Guleker ​​បាន​បង្កើត​​សាលា​អន្តរជាតិ ZAMAN ដំបូង​​សម្រាប់​ថ្នាក់​​​មត្តេយ្យ​​រហូត​ដល់​​ថ្នាក់​ទី​ ១២ ​ក្នុង​ឆ្នាំ​ ១៩៩៧​។ ​​នៅ​ពេល​ដែល​សាលា​នេះ​​ប្តូរ​ទីតាំង​​ថ្មី​នៅ​ឆ្នាំ​ ២០០៦​ ​ឧបនាយក​រដ្ឋមន្រ្តី​ សុខ អាន បាន​​​ចូល​រួម​ជា​អធិបតី​នៅ​ពិធី​សម្ពោធ​អគារ​។ ​លោក​​​បាន​សម្ដែង​​​បំណង​ថា​សាលា​នេះ​នឹង​​​ដើរ​តួនាទី​ក្នុង​ការ​​ធ្វើ​ឲ្យ​ប្រសើរ​ឡើង​​ទំនាក់​ទំនង​​ទ្វេភាគី​រវាង​​តួកគី​ និង​ប្រទេស​កម្ពុជា​។
លោក​នាយក​រដ្ឋមន្រ្តី ​ហ៊ុន សែន ​បាន​អនុម័ត​​​លើ​ការ​​​ដាក់​ពាក្យ​សុំ​​​អាជ្ញាប័ណ្ណ​​​​​សាកល​វិទ្យាល័យ​​​របស់​សាលា​ ZAMAN ក្នុង​ឆ្នាំ​​​ ២០១០​ ខណៈ​លោក សុខ អាន ​បាន​​ចូលរួម​ពិធី​សម្ពោធ​ដោយ​កាត់​ខ្សែ​បូ​រួម​ជាមួយ​​​ឧបនាយក​រដ្ឋមន្រ្តី​តួកគី​លោក Bulent Arinc។
សេចក្តី​ថ្លែងការណ៍​របស់​លោក Kilic បាន​បន្ត​ថា​៖ «​​មន្រ្តី​រដ្ឋាភិបាល​ជាន់​ខ្ពស់​​បាន​ចូលរួម​ពិធី​សម្ពោធ​​។ យើង​មិន​ដែល​​មាន​ការ​ស្អប់​ពី​​រដ្ឋាភិបាល​តួកគី​រហូត​​មក​​ដល់​ពេល​នេះ​»។
ទាំង​​ឯកអគ្គរដ្ឋទូត​លោក Tug និង​ក្រុមហ៊ុន ZAMAN ​បាន​សម្ដែង​ការ​រំពឹង​​ថា​រដ្ឋាភិបាល​នឹង​ចូល​ខាង​ខ្លួន​។
អ្នក​វិភាគ​នយោបាយ​លោក អ៊ូ វីរៈ ​បាន​សម្ដែង​ក្តី​មន្ទិល​​​​ថា​តើ​រដ្ឋាភិបាល​​នឹង​បិទ​សាលា​​ ZAMAN ឬ​អត់​​​នោះ​ទេ។
លោក​បាន​ថ្លែង​ថា​៖ «​​ខ្ញុំ​គិត​ថា​រដ្ឋាភិបាល​តួកគី​មិន​មាន​ឥទ្ធិពល​ច្រើន​ទេ​»​។
ខណៈ​អ្នក​នាំ​ពាក្យ​​ក្រសួង​​អប់រំ​​ និង​​ការ​បរទេស​​បដិសេធ​មិន​ធ្វើ​អត្ថាធិប្បាយ​កាលពី​ម្សិលមិញ​លោកស្រី សឹង សុផារី ​អ្នក​នាំ​ពាក្យ​​​​ក្រសួង​ពាណិជ្ជកម្ម​បាន​ថ្លែង​ថា​៖ «​​មិន​ទាន់​មាន​ចំណាត់​ការ​ណា​ត្រូវ​បាន​ធ្វើ​នៅ​ឡើយ​ទេ​» ​ដោយសារ​លោក​នាយក​រដ្ឋមន្រ្តី ហ៊ុន សែន នៅ​ក្រៅ​ប្រទេស​។ លោកស្រី​បាន​ថ្លែង​ថា​ស្ថានទូត​តួកគី «​បាន​ព្រមាន​យើង​ម្តង​ថា​សាលា​​នេះ​ពាក់ព័ន្ធ​​នឹង​​​មនុស្ស​ដែល​ចង់​ផ្តួល​រំលំ​រដ្ឋាភិបាល​​» និង​ថា​សាលា​នេះ​បាន​ទទួល​ «​ការ​ព្រមាន​​» ​កាលពី​ខែ​មុន​។
ទន្ទឹម​នេះ​សាច់ញាតិ​​​សិស្ស​និស្សិត​​​មាន​ការ​បារម្ភ​ចំពោះ​ផលវិបាក​​បើ​​បិទ​សាលា​នេះ​។
លោក សាតា ម៉ូរ៉ាត ប្រធាន​សមាគម​​​និស្សិត​កម្ពុជា​​នៅ​តួកគី​ដែល​ក្មួយ​ប្រុស និង​បង​ប្អូន​ប្រុស​​របស់​គាត់​​​កំពុង​សិក្សា​នៅ​ទី​នោះ​បាន​ថ្លែង​​ថា​ការ​បិទ​សាលា​​​ដែល​​ល្អ​បំផុត​នៅ​កម្ពុជា​នឹង​​ធ្វើ​ឲ្យ​ប៉ះពាល់​ដល់​អនាគត​​របស់​ពួកគេ​។
លោក​ថា​៖ «​គុណភាព​អប់រំ​ និង​​សញ្ញាបត្រ​​ពី​សាលា​ Zaman​គឺ​មាន​តម្លៃ​ស្មើ​​នឹង​សាលា​ដទៃ​ទៀត​​​​នៅ​អាមេរិក​ ឬ​អឺរ៉ុប​ដូច្នេះ​វា​ពិបាក​ស្វែង​រក​សាលា​ដទៃ​ជំនួស​»៕ PS

Monday, July 18, 2016

ចន ច័ន្ទលក្ខិណា ទុក​ពេល​ឲ្យ​​បុរស​ម្នាក់​១​សប្តាហ៍ ​ដើម្បី​រក​ភស្តុតាង​​ដែល​​ហ៊ាន​​ចោទ​ថា «នាង​ជាស្រីក្បត់ប្ដី»


(ភ្នំពេញ)៖ តារាសម្តែងចាស់វស្សា ហើយនៅតែរក្សាបានប្រិជាប្រិតភាព អ្នកនាង ចន ច័ន្ទលក្ខិណា កាលពីម្សិលមិញ បានផ្ទុះកំហឹងខឹងដាច់ក្បាលដាច់កន្ទុយ បន្ទាប់ពីនាងបានបង្ហោះរូបថតមួយសន្លឹក ដែលថតជុំគ្នាពីរនាក់ម្តាយ-កូនដោយបានសរសេរខ្លីថា «មុខដូចឪគ្មានល្អៀង មកម៉ែម៉ាបន្តិចណាសោះហ្មង!»។ ប៉ុន្តែភ្លាមៗនោះក្រោយពីនាងបង្ហោះ មិនបានប៉ុន្មាននាទីផង ក៏ស្រាប់តែឃើញមានម្ចាស់ Acount Facebook មួយ មានឈ្មោះថា «វឿន ចាន់វីរៈបុត្រ» បានសរសេរ Comment មកថា «ម៉ែក្បត់ម៉េចដូចម៉ែ!»។
ត្រឹមតែ Comment ពាក្យមួយឃ្លា ដោយខ្លីនេះសោះ បានធ្វើឲ្យអ្នកនាង ចន ច័ន្ទលក្ខិណា ឡើងកំដៅឆេះដុំប្រតិកម្មវិញថា «ច្បាស់អត់ថាខ្ញុំក្បត់ ? រកភ័ស្តតាងឲ្យច្បាស់ បើមិនច្បាស់អ្នកឯង នឹងជួបខ្ញុំនៅតុលាការ ឥឡូវខ្ញុំទុកពេលឲ្យអ្នកឯងមួយអាទិត្យ លាងខួររកភ័ស្តុតាងឲ្យច្បាស់ អាទិត្យក្រោយជួបគ្នា!»។ 
ជាមួយគ្នានេះ តារាស្រីអ្នកនាង ចន ច័ន្ទលក្ខិណា ក៏បានបញ្ជាក់បន្ថែមថា« ចាំមើលគេក្លាហាន ចេញមុខមកតវ៉ាឬអត់ ឥឡូវសុំលេងអាអ្នកហ៊ាន មកខមមិនបែបនេះ ក្នុង Acc ខ្ញុំម្តង។ កុំអាងខ្ញុំជាមនុស្សមហាជន ចង់មកដៀលខ្ញុំស្រេចចិត្ត ខ្ញុំបង្ហោះក្នុង Acc ផ្ទាល់ខ្លួនរបស់ខ្ញុំទេ តែអ្នកមកបំពានសិទ្ធខ្ញុំ បំណាច់អ្នកមិនគោរពសិទ្ធិខ្ញុំទៅហើយ ខ្ញុំក៏មិនគោរពអ្នកវិញដែរ។ ខ្វះអីមនុស្សជេរខ្ញុំ និងដៀលខ្ញុំ តែខ្ញុំមិនខ្វល់ ព្រោះពួកគេមិនដែលចូលមកជេរក្នុង Acc ផ្ទាល់ខ្លួនខ្ញុំទេ ខ្ញុំលែងយល់មុខទៀតហើយ ហើយបើក្លាហានចេញមុខមក!»។
ទន្ទឹមនឹងគ្នានេះ ការប្រកាសគំរាមប្តឹង ពីសំណាក់អ្នកនាង ចន ច័ន្ទលក្ខិណា គេក៏សង្កេតឃើញ មានអ្នកគាំទ្រនៅលើហបណ្តាញសង្គម ហ្វេសប៊ុកនាងជាច្រើន ក៏បានគាំទ្រនឹងជម្រុញ ឲ្យចន ច័ន្ទលក្ខិណា ដាក់ពាក្យទៅបុរស ដែលជាម្ចាស់ Acount Facebook ខាងលើនេះផងដែរ។ ប៉ុន្តែគេនៅមិនទាន់ដឹងទេថា តើអ្នកនាង ចន ច័ន្ទលក្ខិណា ពិតជាចិត្តសឿង ប្តឹងបុរសម្នាក់នេះ ឬយ៉ាងណាទេ ប្រសិនបើគ្មានការចេញមុខសុំទោសជាសាធារណៈទេនោះ៕ 
ប្រភព ៖ khmertalking
កំណត់ហេតុខ្មែរឡូត៖
គួររំលឹកព័ត៌មានពាក់ព័ន្ធ កាលពីលើកមុនផងដែរថា តារាសម្តែង និងជាពិធីការិនី ប្រចាំស្ថានីយទូរទស្សន៍ បាយ័ន អ្នកមេម៉ាយចាយសម្រស់ អ្នកនាង ចន ច័ន្ទលក្ខិណា បានមានគម្រោង ក្នុងការរៀបចំពាក្យបណ្តឹង ប្តឹងបុរសម្នាក់ ដែលធ្វើការជេរប្រមាថនាងថា ជាស្រីក្បត់ប្តីនៅលើ បណ្តាញទំនាក់ទំនង សង្គមជាសារធារណៈ។
ដោយនាងចាត់ទុកថាការប្តឹង ទៅលើបុរសម្នាក់នេះ គឺគ្រាន់តែជាការស្វែងរក យុតិ្តធម៌សម្រាប់ខ្លួនឯង តែប៉ុណ្ណោះ។ អ្នកនាង ចន ច័ន្ទលក្ខិណា បានរំលេចរូបថតមួយសន្លឹក ដែលនាងថតជាមួយកូនស្រីបណ្តូលចិត្ត ហើយនាងភ្ជាប់មកជាមួយសារថា «មុខដូចឳគ្មានល្អៀងមកម៉ែ ម៉ាបន្តិចណាសោះហ្មង !!!»។
ហើយនៅក្នុងនោះ ក៏មានបុរសម្នាក់មានឈ្មោះថា វឿន ចាន់វីរៈបុត្រ ចូលមក Comment ថា «ម៉ែក្បត់មេចដូចម៉ែ» ដែលជាដើមហេតុធ្វើ ឲ្យតារារូបនេះ ឆេះដុំតបតទៅវិញដោយមិនសំចៃដៃថា « ច្បាស់អត់ថាខ្ញុំក្បត់ ? រកភ័ស្តុតាងឲ្យច្បាស់ បើមិនច្បាស់អ្នកឯង នឹងជួបខ្ញុំនៅតុលាការ ឥឡូវខ្ញុំទុកពេលឲ្យអ្នកឯង១អាទិត្យ លាងខួររកភ័ស្តុតាង អោយច្បាស់ អាទិត្យក្រោយជួបគ្នា» ។ 

Popular Posts

Sponsor Ads

Total Pageviews

សិល្បះ តារា

សុខភាព

សេដ្ឋកិច្ច

នយោបាយ

សង្គម